Genta e “BB” sërish mes dy zjarresh, lidhet me Emilion e takohet me Rubensin

Duket se Genta Gjalpi, vajza nga Korça që u bë finaliste e “Big Brother 5”, nuk e harron dot të shkuarën e saj me Rubensin, ndërsa rrezikon sërish. E sapolidhur me një futbollist nga Gjirokastra, që quhet Emilio, ajo vazhdon ta takojë Rubensin, edhe pse u betua publikisht se me të nuk do të kishte më punë. Por me sa duket e ka pak të vështirë ta harrojë atë histori dashurie, përderisa vazhdon dhe pi kafe me Rubensin, ndërkohë që i dashuri i ri, Emilio, është i angazhuar me stërvitje. Të dielën ajo festoi 22-vjetorin e lindjes në Tiranë, në një party të organizuar me shoqërinë e miqve të saj, kryesisht ish-konkurrentë të “Big Brother 5”, ku nuk mungoi Emilio. Por duket se jeta shpirtërore e Gentës është ngatërruar sërish, aq sa ajo nuk po gjen dot qetësi.